بارانبارین لە شاری سلێمانی و دەوروبەری دەستیپێكردووەتەوە و كەمێك لەمەوبەر دیمەنی هەورەبروسكە لە ئاسمانی شارەكەدا، بووە مایەی سەرنجی بەشێك لە هاوڵاتییان و شارەزایانی بواری كەشناسی.
پێشتر ئاراس جەبار شارەزای كەشناسی رایگەیاندبوو، “ئاسمان و کەشی ناوچە جیاجیاکانی ھەرێمی کوردستان بە زۆری گۆڕاوە بۆ نیمچەھەور لەگەڵ ڕوودانی ھەورەبروسکە و نمەباران لە بەشێکی ناوچەکانی سنووری هەردوو پارێزگای سلێمانی و کەرکوک و ئیدارەی راپەرین و کاریگەرییەكەی لە ماوەکانی داھاتوودا و بە تایبەت لە شەودا زیاتردەبێت”.
بەپێی راگەیەندراوی دەستەی گشتیی کەشناسیی عێراق كە ئەمڕۆ دووشەممە بڵاویكردەوە، لە سەرەتای ئەم مانگەوە بارانبارین دەستیپێکردووە و بە “ئاماژەیەکی دڵخۆشکەر” ناوزەدیكرد و ئاشكرایكرد، “لە مانگی داهاتووەوە شەپۆلەکانی بارانبارین بە فراوانی دەستپێدەکەن”.
