سەرباری نزیكبوونەوەی وەرزی زستان و دابارین، هۆشداری لە بەردەوامبوونی خۆڵبارین دەدرێت و وەزارەتی ژینگەی عێراق دەڵێت، “چوار هۆكار لە پشت گۆڕانی ئاووهەوای عێراقەوەن”.
بەپێی وتەی عیسا فەیاز یەكێك لە بەڕێوەبەرە گشتییەكانی وەزارەتی ژینگەی عێراق، لە ماوەكانی داهاتوودا دیاردەی خۆڵبارین لە عێراق بەردەوامدەبێت و هۆكارەكەی گەڕاندووەتەوە بۆ كەمبوونەوەی ئاو، وشكەساڵی، بەبیابانبوون و كەمیی درەخت و سەوزایی.
بەڕێوەبەرە گشتییەكەی وەزارەتی ژینگە جەختدەكاتەوە لەوەی كە گۆڕانی ئاووهەوا، دەبێتەهۆی روودانی دیاردەگەلێك لە كەشوهەوادا كە لە وادەی خۆیاندا نین و گۆڕان بەسەر كاتەكانیاندا دێت، وەك خۆڵبارین و گەرما و بارانبارین لە وەرزەكانی جیاواز لەو وەرزانەی كە باوە تیایاندا رووبدەن.
