كەشناسیی هەرێمی کوردستان پێشبینییەكانی بۆ کەشوهەوای ئەمڕۆ و سبەینێی بڵاوکردەوە، بەپێی کەشناسی ئەمڕۆ تاوەباران بەردەوامدەبێت و لە ناوچە شاخاوییەکان لێزمەباران دەبێت.
بەپێی پێشبینییەکانی کەشناسی، ئەمڕۆ دووشەممە ئاسمان بە گشتی هەور دەبێت لەگەڵ بروسکە و تاوەبارانی جیاجیا لە ناوچەکانی ناوەڕاست و رۆژهەڵاتی هەردوو پارێزگای هەولێر و سلێمانی، لە ناوچە شاخاوییە سنوورییەکانی باکووری خۆرهەڵاتیش دابارین زیاتردەبێت و بە شێوەی لێزمەباران دەبێت.
ئاماژە بۆ ئەوەش كراوە، لە کاتەکانی ئێوارەدا کەشوهەوا جێگیردەبێت و ئاسمان بۆ پەڵەهەور دەگۆڕێت، پلەکانی گەرماش یەک بۆ دوو پلە دادەبەزن.
كەشناسیی هەرێمی کوردستان لەبارەی پێشبینییەكانی كەشوهەوای سبەینێ سێشەممەوە دەڵێت، “ئاسمان ساماڵ و پەڵەهەور دەبێت و پلەکانی گەرما یەک بۆ دوو پلە بەرزدەبنەوە”.
