ئیلۆن مەسک خاوەنی کۆمپانیای تێسلا بۆ ئۆتۆمبێلی کارەبایی گەورەترین پشکی کۆمپانیاکە کە نرخەکەی 10 ملیار دۆلارە دەفرۆشێت.
بەپێی ڕاپۆرتێکی پێگەی بزنس ئینسایدەر، مەسک دەیەوەێت ئەو پشکەی کۆمپانیاکەی بفرۆشێت بەمەبەستی تەواوکردنی گرێبەستی کڕینی تویتەر.
ڕاپۆرتەکە دەڵێت، مەسک لە هەفتەی داهاتوودا بە بڕی 5 بۆ 10 ملیار دۆلار لە پشکی تێسلا دەفرۆشێت، بۆ تەواوکردنی کڕینی تویتەر کە بڕەکەی 44 ملیار دۆلارە.
ئێستا مەسک ئەوەی توانیویەتی دابینی بکات، 12.5 ملیار دۆلارە، دەیەوێت لەڕێگەی باوەڕپێهێنانی سەرمایەداران و وەبەرهێنەرانەوە بۆ هاوکاریکردنی بڕی 32 ملیار دۆلار دەستبخات، ئەوەش بەهۆی قەیرانە جیهانییەکان و مەترسییە ئابورییەکانەوە لە ئێستادا سەختە بۆ مەسک.
کاتی کۆتایی بۆ گرێبەستی کڕینی تویتەر 28ی ئەم مانگەیە، ئەوەش بە مانای ئەوەی مەسک ڕووبەڕووی هەفتەیەکی یەکلاکەرەوە دەبێتەوە، بۆیە ئەگەری زۆرە لە چەند ڕۆژی کەمی داهاتوودا پشکی گەورەی تێسلا بفرۆشێت.
