چێوەی هەماهەنگی دوو وادە بۆ پێكهێنانی حكومەت دیاریدەكات و پەرلەمانتارێكی هاوپەیمانێتییەكە دەڵێت، “دوایناخەین”.
ئەگەرچی هەفتەی رابردوو، داوا لە ئەنجومەنی نوێنەران كرا رۆژی شەممە 23 تشرینی یەكەم كۆببێتەوە بۆ بەخشینی متمانە بە كابینەی نوێی حكومەت، بەڵام پێناچێت كۆبوونەوەكە سەربگرێت و چێوەی هەماهەنگی كە سەرۆك وەزیران سەر بەو هاوپەیمانێتییەیە، دوو رۆژی دیكەی بۆ راگەیاندنی كابینەی حكومەت دیاریكرد.
سالم عەنبەكی پەرلەمانتاری چێوەی هەماهەنگی رایگەیاند، رۆژی دووشەممە یاخود سێشەممەی داهاتوو ئەنجومەنی نوێنەران كۆدەبێتەوە بۆ متمانەدان بە كابینەی حكومەتەكەی محەمەد شیاع سودانی.
عەنبەكی جەختدەكاتەوە كە هیچ پاساوێك نییە بۆ دواخستنی كۆبوونەوەی ئەنجومەنی نوێنەران و بەخشینی متمانە بە حكومەتی نوێ و دەڵێت، “گفتوگۆكان بەردەوامن بۆ چارەسەركردنی ناكۆكییەكان لەبارەی پۆستە وەزارییەكان و گەیشتن بە رێككەوتن لە نێوان لایەنەكاندا”.
