بەڕێوەبەرایەتیی گشتیی كەشناسی و بومەلەرزەزانیی هەرێم ڕایدەگەیەنێت، ئەمڕۆ ئاسمان بە گشتی هەور دەبێت لەگەڵ هەبوونی تاوەباران و بروسكە، سەرەتاش بارانبارین بە شێوەی نمەباران لە ناوچەشاخاوییەكان و پارێزگای دهۆك دەبێت.
بەپێی ڕاگەیەندراوێكی بەڕێوەبەرایەتیی گشتیی كەشناسی و بومەلەرزەزانیی هەرێم كە وێنەیەكی دەست تۆڕی میدیایی ئێستا كەوتووە و هاتووە، ئەمڕۆ هەینی، “ئاسمان هەور دەبێت لەگەڵ هەبوونی تاوەباران و بروسكە، سەرەتا بارانبارین بە شێوەی نمەباران لە ناوچەشاخاوییەكان و پارێزگای دهۆك دەبێت دواتر لە زۆربەی ناوچەكانی تر بارانبارینمان دەبێت”.
لە ڕاگەیەندراوەكەدا هاتووە، خێرایی با لەسەرخۆ و مامناوەند دەبێت و لە نێوان 10 بۆ 20 كیلۆمەتر لە كاتژمێرێكدا دەبێت و لە هەندێك كات چالاك دەبێت بۆ نزیكەی 30 كیلۆمەتر لە كاتژمێرێكدا، پلەكانی گەرماش نزمدەبنەوە و مەودای بینینیش كەم دەبێتەوە.
ئاماژە بۆ ئەوەش كراوە، “سبەینێ شەممە ئاسمان بە گشتی هەور دەبیت لەگەڵ بوونی بارانبارینێكی كەم لە زۆربەی ناوچەكان، لە ناوچەشاخاوییەكان بارانبارین زیاتر دەبێت، كاریگەری ئەم ناجێگیرییە تا بەرەبەیانی ڕۆژی یەكشەممە بە تایبەت لە ناوچەشاخاوییەكان بە لاوازی دەمێنێتەوە”.
