کۆمسیۆنی مافەکانی مرۆڤی عێراق هۆشداریدەدات لەوەی ڕێژەیەکی زۆری تووشبوون بە شێرپەنجە لە پارێزگای بەسرە تۆماردەکرێت، بە بەرزبوونەوەیەکی نا ئاسایی لە رێژەی تووشبوواندا ناوی دەبات.
بەپێی ئاماری کۆمسیۆنی مافەکانی مرۆڤی عێراق، پارێزگای بەسرە ساڵانە 9 هەزار تووشبووی شێرپەنجەی تێدا تۆماردەکرێت.
ئاماژەی بەوەشکردووە، لە ماوەی ساڵانی 2018، 2019 و 2020دا پارێزگاکە 27 هەزار تووشبووی تۆمارکردووە، لەگەڵ ئەوەشدا لە هەندێک لە شارۆچکە و ناوچەکانی سەر بە پارێزگاکەدا تووشبوون بە شێرپەنجە لەناو کۆرپەلەشدا تۆمارکراوە.
کۆمسیۆنەکە دەڵێت، “بەرزبوونەوەیەکی نائاسایی لە ژمارە و ڕێژەی تووشبوون بە شێرپەنجە لەناو خێزانەکانی بەسرەدا هەیە”.
سەبارەت بە ڕێژەی مردن دەریدەخات، کە مردن بە جۆرە جیاوازەکانی شێرپەنجە 30%ی کۆی هۆکارەکانی گیانلەدەستدان لەو پارێزگایە پێکدەهێنێت.
