گەنجێك لەكاتی راوەماسیدا لە سۆران گیانیلەدەستدا و بەرگریی شارستانیی ناوچەكە دەڵێت، تەرمەكە دەرهێنراوەتەوە.
بەڕێوەبەرایەتیی بەرگریی شارستانیی سۆران ڕایگەیاند، كاتژمێر 1:36 خولەكی پاش نیوەڕۆی ئەمڕۆ هاوڵاتییەك لە رووباری جوندیان، گۆمی چناران-ی سەر بە قەزای رەواندز خنكا.
ئەوەشی وت، پاش ئاگاداركردنەوەیان، تیمی مەلەوانی سەر بە بەرگریی شارستانی گەیشتنە شوێنی رووداو و گەڕان و پشكنین، دوای نزیكەی یەك كاتژمێر تەرمەكەی دۆزراوەیە و رەوانەی پزیشكی دادی كرا.
قوربانییەكە ناوی (عەبدوڵا شەهاب نەجمەدین)ە لەدایكبووی ساڵی (1995)ە، دانیشتووی قەزای سۆران و پیشە كاسب بووە.
بەرگریی شارستانی روونیشیكردەوە، لە کاتى راوەماسى دووچارى خنکان بووە و بەتەنها بووە.
لە سەرەتاى ئەمساڵەوە تاکو ئێستا (12) هاوڵاتى بە رووداوى جیاجیا لە رووبارەکانى سەر بە ئیدارەى سەربەخۆى سۆران خنکاون.
