بەڕێوەبەری پەروەردەی سلێمانی ڕایگەیاند، دابەشکردنی نەوت بەسەر خوێندنگەی ناوچە ساردەکان کۆتایی هاتووە و لە خوێندنگەکانی پەروەردەی ڕۆژهەڵاتیش دەستیپێکردووە.
دڵشاد محەمەد بەڕێوەبەری پەروەردەی سلێمانی لە کۆنگرەیەکی ڕۆژنامەوانیدا ڕایگەیاند، “دوو ملیۆن و 350 هەزار لیتر نەوتمان بۆ خوێندنگەکان دابینکردووە، لە ناوچە ساردەکانیش دابەشکردنی تەواو بووە”.
ئاماژەی بەوەش کرد، “لە پەروەردەی ڕۆژهەڵات دەست بە دابەشکردنی نەوت کراوە، دڵنیاتان دەکەینەوە ئەو بڕە نەوتەی دابینکراوە بە ڕێکوپێکی دابەشدەکرێت”.
باسی لەوەشکرد،”ئەمساڵ چوار هەزار سۆپامان کڕیوە، باوەڕ ناکەم کێشەی کەمی سۆپامان بۆ دروست بێت، ئەگەریش دروست بێت پارەیەکی باشی فرۆشتگای ناو خوێندنگەکانمان لەبەردەستدایە خەرجی بکەین”.
ئاشکراشی کرد، “حکومەتی هەرێم پێنج ملیار دیناری بۆ پەروەردەی سلێمانی بۆ کڕینی پێداویستییەکان دابینکردووە، بۆ خزمەتی خوێندکارانە و بۆ ژووری مامۆستایان نییە”.
