بەڕێوەبەرایەتیی دارستان و پاوانی سلێمانی هۆشداری لە مەترسیی سەر دارستانەکان دەدات، بەپێی بەڕێوەبەرایەتییەکە زیادەڕەوی و بڕینەوەی دار زۆربووە.
لە لێدوانێکدا بۆ تۆڕی میدیایی ئێستا هاوکار جەلال بەڕێوەبەری دارستان و پاوانی سلێمانی ڕایگەیاند، مەترسیی سەر دارستانەکان تەنها سلێمانی ناگرێتەوە بەڵکو هەموو دارستانەکان بەهۆی زیادەڕەوییەوە مەترسییان لەسەرە.
ئاماژەی بەوەکرد، کە زیادەڕەوییەکان لە بڕینەوەی دار لەلایەن خەڵکەوە زیادیکردووە، ئەوەش هەڕشە و مەترسییە بۆ سەر دارستانەکان.
هۆکاری زیادبوونی زیادەڕەوییەکان بەپێی بەڕێوەبەری دارستان و پاوانی سلێمانی بۆ گرانیی نەوت و دابەشنەکردنی نەوتی ماڵانەوەیە کە خەڵک زیاتر پەنا بۆ بڕینەوەی دار دەبەن.
لەگەڵ ئەوەشدا جەختیکردەوە، کە بۆ ئەمساڵ ڕێکارەکانیان بۆ ڕێگریکردن لە بڕینەوەی دارستانەکان و زیادەڕەوی توندتر کردووە و هەماهەنگییان لەگەڵ پۆلیسی دارستان هەیە بۆ بەدواداچوونی بڕینەوەی دارستانەکان.
باسی لەوەشکرد، کە خۆشبەختانە لەمساڵدا هیچ حاڵەتیکی ئاگرکەوتنەوە لە دارستانەکانی سلێمانی ڕووینەداوە، تەنها یەک حاڵەت لە شاخی گۆیژە هەبووە و زیانی بە چوار دار گەیاندووە.
لەگەڵ ئەوەشدا پڕۆژەی سەوزکردنی شاخی گۆیژە و چاندنی نەمام لە سلێمانی بەردەوامیی هەیە و تائێستا 800 دۆنم سەوزکراون و بە هەماهەنگی لەگەڵ چوار کۆمپانیا سەرپەرشتی دەکرێن.
