پۆلیسی دارستان و ژینگەی سلێمانی هۆشداری دەدات و دەڵێت، “دارستانەکان لەژێر هەڕەشەیەکى مەترسیداردان، دیمەنى بڕینى دارى سروشتى و لەناوچوونى سروشت و ژینگە کارەساتێکى گەورەیە”.
كەمێك لەمەوبەر بەڕێوەبەرایەتیی پۆلیسی دارستان و ژینگەی پارێزگای سلێمانی ڕاگەیەندراوێكی بڵاوكردەوە و ڕایگەیاند، هەندێک هاوڵاتى بێگوێدانە بەرپرسیاریەتى، هەوڵى شێواندنى ژینگە دەدەن و چەند كەسێك بەو هۆیەوە دەستگیركراون.
بەپێی ڕاگەیەندراوەكە، دوو كەس لە گوندى هەناری سەر بە ناحیەى بەرزنجە لە سنوورى سەیدسادق دەستگیرکراون كە سەرقاڵى داربڕین بوون، هێزێكی بەڕێوەبەرایەتییەكە دەستیانگرتووە بەسەر ئۆتۆمبێلی تۆمەتبارەكان و چەندین دارى بڕاوەدا.
بەڕێوەبەرایەتیی پۆلیسی دارستان و ژینگەی پارێزگای سلێمانی ئاشكرایكردووە، لە سنوورى شارباژێڕ بە تۆمەتى تێکدانى ژینگە و سروشت، دوو هاوڵاتى دەستگیرکراون و دەستگیراوە بەسەر حەفارەیەك و گەڵابەیەكدا.
