قائیمقامی قەزای پێنجوێن ڕایدەگەیەنێت، كەمێك لەمەوبەر لە ڕووداوێكی هاتوچۆدا لەسەر ڕێگای سەرەكیی پێنجوێن- سلێمانی و نزیك گوندی كەژان سێ كەس برینداربوون و بەهۆی ڕووداوەكەشەوە ئاستەنگی هاتوچۆ بۆ هاوڵاتییان لەو ڕێگایە دروستبووە.
زانا ڕەحمان قائیمقامی قەزای پێنجوێن لە لێدوانێكدا بە تۆڕی میدیایی ئێستای ڕاگەیاند، كەمێك لەمەوبەر لە لەسەر ڕێگای پێنجوێن- سلێمانی و نزیك گوندی كەژان ڕووداوێكی هاتوچۆ لە نێوان ئۆتۆمبێلێكی گواستنەوەی سووتەمەنی و ئۆتۆمبێلێكی تایبەتدا ڕوویدا بەهۆیەوە سێ كەس برینداربوون.
ئاماژەی بۆ ئەوەش كرد، لە ئێستادا تیمەكانی بەرگریی شارستانیی سەرقاڵی خاوێنكردنەوەی ڕێگاكان تا ئەو تانكەرەی سووتەمەنییەكەی دەگواستەوە ئاگر نەگرێت.
