سەرۆککۆماری تورکیا هێرشیکردە سەر ئیمانیول ماکرۆنی سەرۆکی فەرەنسا و ڕایگەیاند، ئەوان هیوادارن بەو نزیکانە لە دەستی ماکرۆن ڕزگاریان بێت.
وتەکانی ڕەجەب تەیب ئەردۆغان، سەرۆککۆماری تورکیا لە دوای نوێژی هەینییەوە بوو دوێنێ 4ی کانونی یەکەم، دواتر ئیمانیۆل ماکرۆنیش وەڵامیدایەوە و ڕایگەیاند، “ئەردۆغان دەبێت سنورێک بۆ قسەکانی دابنێت”.
ئەردۆغان ڕایگەیاندووە، “فەرەنسا دۆخێکی خراپ بەدەست ماکرۆنەوە تێدەپەرێنێت، بۆیە هیوادارین ئێمە و فەرەنسا زوو لە شەڕی ئەم پیاوە ڕزگارمان بێت”.
میدیاکانی فەرەنسا بڵاویانکردەوە، ئیمانوێل ماکرۆنی سەرۆکی وڵاتەکەیان ڕایگەیاندووە، کە رەجەب تەیب ئەردۆغانی سەرۆکی تورکیا ئازادی لە میللەتەکەی سەندووەتەوە.
ماکرۆن وتوشیەتی، ” لێدوانەکانی ئەردۆغان جێگەی قبوڵکردن نییە، زمانی ئاڵۆزکردن بەکاردەهێنێت و ئەم قسانە خزمەت بە شێوازی مامەڵەکردن ناکات”.
ئەمساڵ ناکۆکییەکانی فەرەنسا و تورکیا لەسەر کێشەکانی ڕۆژهەڵاتی ناوەڕاست و دەریای ناوەڕاست گەیشتە لوتکە و ئەوە جاری یەکەم نییە کە ئەردۆغان هێرشدەکاتە سەر ماکرۆن و پێشتریش ئەردۆغان بە ماکرۆنی وتبوو “دەرونی نەخۆشە و دەبێت چارەسەری دەرونی وەربگرێت”.
لەگەڵ پشتگیری ماکرۆن بۆ هەفتەنامەی شارلی ئیبدۆ رەجەب تەیب ئەردۆغان، ئەم پرسەی قۆستەوە و هەوڵیدا سۆزی موسڵمانانی جیهان لە دژی سەرۆکی فەرەنسا بجولێنێت، ئەمەش بوو بە بەشێک لە ناکۆکییەکانی نێوانیان.
