نەخۆشخانەی فریاكەوتنی ڕۆژئاوای هەولێر ڕایدەگەیەنێت، لە شەش مانگی ڕابردوودا 325 حاڵەتی گەستنی سەگ تۆماركراون.
نەخۆشخانەكە ڕاگەیەندراوێكی بڵاوكردەوە و دەڵێت، بەهۆی ڕاکردنی منداڵێک لە دەست سەگێکی بەڕەڵڵای ناوشار و دوورکەوتنەوەی لە ترس و دڵەڕاوکێی گەستنی، منداڵەکە كەوتووەتە ژێر ئۆتۆمبێلێک و تووشی برینداریی بووە.
ئاشكراشیكرد، دوای ڕەوانەكردنی بۆ نەخۆشخانەی فریاكەوتن، نەشتەرگەریی ڕزگارکردنی ژیانی بۆ ئەنجامدراوە.
نەخۆشخانەی فریاكەوتن ئاماژەی بەوەشكرد، لە شەش مانگی ڕابردوودا 325 حاڵەتی گەستنی سەگی بەڕەڵا تەنها لە نەخۆشخانەكەی ئەوان هەبووە، کە وێڕای ئەوەی مەترسیی چەندین نەخۆشی لێدەکرێت، لە هەمان کاتدا هۆکاری نەمان و کورتهێنانی ڤاکسینی دژەژەهری سەگە لە نەخۆشخانەکاندا.
