بەڕێوەبەرایەتیی پۆلیسی سلێمانی ڕایدەگەیەنێت، حەوت كەس دەستگیركران كە بە جلوبەرگی سەربازییەوە هەڵیانكوتاوەتە سەر بەنزینخانەیەك و داوای سەرانەیان كردووە.
بەپێی ڕاگەیەندراوێكی بەڕێوەبەرایەتیی پۆلیسی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، دوای ئەوەی زانیاری بە هێزەكانی پۆلیس دران كە چەند تۆمەتبارێك بە جلوبەرگی سەربازییەوە هەڵیانكوتاوەتە سەر گۆڕەپانێكی سووتەمەنی و هەڕەشەی دەستبەسەرداگرتنیان كردووە و داوای سەرانەیان كردووە.
لە ڕاگەیەندراوەكەدا هاتووە، بەڕێوەبەری پۆلیسی پارێزگای سلێمانی، بنكەی پۆلیسی چوارچرای ڕاسپارد، بە دواداچوونی ورد و بە پەلە بكەن بۆ دەستگیركردنی تۆمەتباران و دوای گەیشتنی هێزەكانی پۆلیس بۆ شوێنی مەبەست توانرا سەرجەم تۆمەتباران كە ژمارەیان حەوت كەسە دەستگیربكرێن و دەستیشبگیرێت بەسەر چەند پارچە چەكێك و ژمارەیەك فیشەك و شانەی كڵاشینكۆفدا.
ئاماژە بۆ ئەوەش كراوە، لە ئێستادا تۆمەتباران بە بڕیاری دادوەر و بەپێی ماددەی 15 لەیاسای چەك ڕاگیراون و لێكۆڵینەوە لەگەڵیاندا بەردەوامە.
