وێنەی شا چارڵسی سێیەم پاشای نوێی بەریتانیا خرایەسەر دراوی بەریتانی و شێوەكەی ئاشكراكرا.
خانەی سكەلێدانی دراوی بەریتانیا ئەمڕۆ هەینی ئاشكرایكرد، وێنەی شا چارڵسی سێیەم پاشای بەریتانیا خراوەتەسەر دراوی كانزایی و لەگەڵ خستنەڕووی نموونەیەك لە دراوە نوێیەكەدا ڕایگەیاند، بەمنزیكانە دەخرێتە بازاڕەوە.
وێنەكەی شا چارڵسی سێیەم لەسەر پاوەندی بەریتانی، لە لایەن مارتن جێنینگز نیگاركێش و پەیكەرسازی بەریتانییەوە دیزاینكراوە و كارەكە ڕەزامەندیی خوودی پاشای وڵاتەكەی بەدەستهێناوە.
سەرەتا وێنەی شا چارڵسی سێیەم دەخرێتەسەر دوو دراوی كانزایی لە جۆری 5 پاوەندی و 50 پێنسی و وێنەی شاژنە ئێلیزابێسی دووەمیش لە دیوی پشتەوەی دراوەكاندا دەنەخشێندرێت.
جگە لە وێنە، لەسەر دراوەكان بە لاتینی نووسراوە “شا چارڵسی سێیەم، بە سوپاسگوزاریی خودا، داكۆكیكارە لە باوەڕ”.
خانەی سكەلێدانی دراوی بەریتانیا دەڵێت، لە چەند مانگی داهاتوودا دراوەكە دەخرێتە بازاڕەوە.
