بەرپرسانی كەرتی پەیوەندییەكان ڕایدەگەیەنن، ترسیان هەیە لەوەی زستانێكی سەخت كاریگەری لەسەر ژێرخانی پەیوەندییەكان لە ئەوروپادا دروستبكات، بەهۆیەوە كۆمپانیا و حكومەتەكان هەوڵ بۆ سوككردنی ئاستی كاریگەرییەكەی دەكەن.
ئاژانسی ڕۆیتەرز لە زاری چوار بەرپرسی جێبەجێكاری كەرتی پەیوەندییەكان ڕایگەیاند، لەئێستادا سیستمێكی یەدەگی پێویست لە زۆرێك لە وڵاتانی ئەوروپادا نییە بۆ مامەڵەكردن لەگەڵ پچڕانی درێژمەودای تەزووی كارەبا، ئەو پرسەی ئەگەری هەیە ببێتەهۆی پچڕانی خزمەتگوزاریی پەیوەندییەكانی مۆبایل.
هەندێك لە وڵاتانی یەكێتیی ئەوروپا، لەنێویاندا فەرەنسا، سوید و ئەڵمانیا هەوڵ بۆ زامنكردنی بەردەوامیی پەیوەندییەكان دەدەن تەنانەت ئەگەر پچڕانی تەزووی كارەبا ببێتەهۆی نەمانی وزەی عەمباركراوی پاتری هەزاران تاوەری ئەنتێنە بڵاوەبووەكانی سەر خاكەكەیان.
لە وڵاتانی ئەوروپیدا نزیكەی نیو ملیۆن تاوەر (بورج)ی پەیوەندییەكان هەیە، زۆرینەیان پاترییەكی یەدەگیان هەیە و دەتوانن بۆ ماوەی نزیكەی 30 خولەك كاربكەن بۆ كارپێكردنی ئەنتێنەكانی بڵاوەپێكەری تۆڕی مۆبایل.
دوو سەرچاوەی ئاگادار دەڵێت، ئەو پلانەی كۆمپانیای ئیندیس بۆ دابەشكردنی كارەبا لە فەرەنسا پێشكەشیكردووە، ئەگەری پچڕانی كارەبا بۆ ماوەی تا دوو كاتژمێر لە خراپترین سیناریۆدا لەخۆدەگرێت.
بەپێی پلانەكە پچڕانی كارەبا لە ناوچەكان بە نۆرە دەبێت.
