سەرۆكی یەكێتی نیگەرانی لەبارەی بۆردومانەكانی ئێران بۆ سەر هەرێمی كوردستان دەردەبرێت و دەڵێت، پێشهاتێكی مەترسیدار قوڵایی هەرێمی كوردستانی گرتووەتەوە و داوای دەستبەجێ ڕاگرتنی دەكەین.
بافڵ جەلال تاڵەبانی، سەرۆکی یەکێتیی نیشتمانیی کوردستان پەیامێكی بڵاوكردەوە و ڕایگەیاند، بەنیگەرانییەكی زۆرەوە لە بۆردومانەكانی ئەمڕۆی كۆماری ئیسلامی ئێران بۆ سەر خاكی هەرێمی كوردستان دەڕوانین كە چەندین شەهید و برینداری لێكەوتووەتەوە و دەیان خێزانیش ئاوارەبوون. ئەمە پێشهاتێكی ترسناك و مەترسیدارە كە قووڵایی هەرێمی كوردستانی گرتووەتەوە و داوای دەستبەجێ ڕاگرتنی دەكەین.
بافڵ جەلال تاڵەبانی دەشڵێت، “هیچ پاساوێك بۆ ئەم سنووربەزاندنە نییە و مەترسییەكی گەورەیە بۆ سەر ئارامی و ئاسایشی هەرێم و عیراق. داواكارین خاكی هەرێمی كوردستان بۆ یەكلاییكردنەوەی كێشە سیاسی و سەربازییەكان بەكارنەهێنرێت و هاووڵاتییان نەكرێنە قوربانیی ململانێكان. داواكارین هەموولایەك خۆڕاگربن و گفتوگۆ بكەنە بنەمای چارەسەركردنی كێشەكان”.
سەرۆكی یەكێتی داواش لە حكومەتی عێراق دەكات ئەرك و بەرپرسیارێتیی خۆی لە پاراستنی خاكی عێراق و هەرێم جێبەجێ بكات و “سەروەریی وڵات بپارێزێت و ڕێگری لە پێشێلكاری و چەندبارەبوونەوەی هێرشەكان بكات”.
هەروەك وێڕای گەیاندنی پرسە و هاوخەمی قووڵ بۆ كەسوكاری شەهیدان و هیوای چاكبوونەوە بۆ برینداران بافڵ جەلال تاڵەبانی دەڵێت، وەك ئەركێكی نەتەوەیی و نیشتمانیی خۆمان، هەموو دامەزراوە پەیوەندیدارەكانمان ڕاسپاردووە بە دڵسۆزییەوە ئەركەكانیان ڕابپەڕێنن و لەخزمەت هەموواندا بن.
لە كۆتاییشدا سەرۆكی یەكێتی دووپاتیدەكاتەوە، “دەمەوێت هەموولایەك دڵنیابكەمەوە بەئامانجگرتنی هاوڵاتییانی هەرێمی كوردستان و تێكدانی سەقامگیریی خاكەكەمان هەرگیز لەیادناكەین و ڕشتنی خوێنی خەڵكەكەمان لەبیرناچێتەوە”.
