بەڕێوەبەرایەتی کەشناسی و بوومەلەرزەزانی هەرێم ڕایگەیاند، ئەمڕۆ ئەگەرى نمەباران لە ناوچە شاخاوییە بەرزەکان و سەنتەرى پارێزگاکان هەیە، سبەینێش پلەکانی گەرما نزمبوونەوەی زیاتر بەخۆیانەوە دەبینن.
بەڕێوەبەرایەتی کەشناسی و بوومەلەرزەزانی هەرێم بڵاویکردەوە، ئەمڕۆ پێنجشەممە ئاسمان بە گشتى نیمچەهەور لەگەڵ هەورى تەواو دەبێت لە زۆربەى کاتەکان، لەگەڵ زیادبوونى خێرایى با ئەگەرى بەرزبوونەوەى تۆزوخۆڵ هەیە لەسەر بەشێک لە سنوورى پارێزگاى هەولێر و سلێمانى و کەرکوک، لەگەڵ نزمبوونەوەى پلەکانى گەرما بە نزیکەى (2-3) پلەى سیلیزى.
ئاماژەی بەوەشکرد، “ئەگەرى نمەباران لەسەر هەندێک ناوچە شاخاوییە بەرزەکان و سەنتەرى پارێزگاکان بەشێوەى پروشکەباران، هەندێک کات و ناوچە ئەگەرى بارانێکى مامناوەندى کورت خایەنى هەیە”.
ئاشکراشیکرد، “سبەی هەینی ئاسمان نیمچەهەور دەبێت پاشان بۆ ساماڵ و پەڵەهەور دەگۆڕێت، پلەکانی گەرما بە نزیکەى (1-2) پلەى سیلیزى نزمدەبنەوە بە بەراورد بە تۆمارکراوەکانى ئەمڕۆ”.
