وتەبێژی حکومەتی عێراق ڕایگەیاند، ئەجێندای سەرەکیی سەردانەکەی مستەفا کازمی بۆ ئەمریکا، بەشداریکردنیەتی لە کۆبوونەوەی کۆمەڵەی گشتیی نەتەوەیەکگرتووەکاندا.
حەسەن نازم، وتەبێژی حکومەتی عێراق، لە كۆنگرەیەكی ڕۆژنامەوانیدا ڕایگەیاند، “ئەمڕۆ مستەفا کازمی سەرۆک وەزیران بەرەو ئەمریکا بەڕێدەکەوێت، بە مەبەستی بەشداریکردنی لە خوولی 77ـەمینی کۆبوونەوەی کۆمەڵەی گشتیی نەتەوە یەکگرتووەکاندا”.
ئاماژەی بەوەش کرد، “بەشداریکردنەکەی کازمی لەڕووی دیپلۆماسییەوە گرنگییەکی تایبەتی بۆ عێراق دەبێت، پێگەی عێراق لە ئاستی نێودەوڵەتیدا بەهێزدەکات، هاوکات چاوی بە بەرپرسانی پلەباڵا دەکەوێت”.
بەپێی وتەی حەسەن نازم، “حکومەت سەرکەوتووبووە لە دۆسیەی پەیوەندییە دەرەکییەکان و تێپەڕاندنی قەیرانەکاندا، سەردانەکەی کازمیش بۆ ئەمریکا لە چێوەی هەوڵە دیپلۆماسییەکانی حکومەتدایە”.
