كۆمسیۆن كۆڵان بە كۆڵان بۆ تۆماركردنی ناوی دەنگدەران دەگەڕێت

لە دوایین هەڵبژاردنی عێراقدا كە هەڵبژاردنە پەرلەمانییە پێشوەختەكەی 10ی ئۆكتۆبەری ساڵی ڕابردوو بوو، دەنگدەرانی سنووری هەردوو پارێزگای سلێمانی و هەڵەبجە و هەردوو ئیدارەی گەرمیان و ڕاپەڕین، یەك ملیۆن و 360 هەزار دەنگدەر بوون و ئێستاش ژمارەكە زیادیكردووە. بۆ تۆماركردنی ناوی دەنگدەرانی نوێ، كۆمسیۆن بەردەوامە لە پرۆسەی بایۆمەتری و دروستكردنی كارتی ئەلیكترۆنی بۆ دەنگدەران.

ئامانج عەزیز، بەڕێوەبەری ئۆفیسی سلێمانیی كۆمسیۆنی باڵای سەربەخۆی هەڵبژاردنەكانی عێراق، لە لێدوانێكدا بۆ تۆڕی میدیایی ئێستا ڕایگەیاند، پرۆسەی تۆماركردنی ناوی دەنگدەران و تۆماری بایۆمەتری بەردەوامە و دەیانەوێت هەڵبژاردن بە تۆمارێكی پاکی دەنگدەرانەوە بەڕێوەبچێت.

ئاشكرایكرد، لە ڕێگەی 79 ناوەندی جێگیری كۆمسیۆنەوە لە سنووری هەردوو پارێزگای سلێمانی و هەڵەبجە و ئیدارەكانی گەرمیان و ڕاپەڕین، ناوی نزیکەی 70%ی دەنگدەران تۆمارکراون و وتی، ئێستا لەدایكبووانی نوێ مافی دەنگدانیان هەیە و تا لەدایكبووانی ساڵی 2004 بەشداردەبن، ئەوەش وایكردووە پرۆسەی تۆماركردنی ناوی دەنگدەران فراوانتر ببێت و کاتی زیاتری پێویستە.

بەپێی وتەی ئامانج عەزیز، چەندین تیمی گەڕۆک لە سنووری سلێمانی، هەڵەبجە، گەرمیان و ڕاپەڕین کۆڵان بە کۆڵان دەگەڕێن بۆ تۆماركردنی ناوی دەنگدەران و دروستكردنی كارتی ئەلیکترۆنی بۆیان.

بەڕێوەبەری ئۆفیسی سلێمانیی كۆمسیۆنی باڵای سەربەخۆی هەڵبژاردنەكانی عێراق ڕاشیگەیاند، تیمەكانیان هەفتانە ناوی هەزار هاوڵاتی تۆماردەكەن و داوایكرد ئەو دەنگدەرانەی کارتی ئەلیکترۆنیی دەنگدانیان بۆ دروستکراوە و وەریان نەگرتووەتەوە، سەردانی ناوەندەكانی كۆمسیۆنی هەڵبژاردنەكان بكەن و كارتە ئەلیكترۆنییەكان وەربگرنەوە.

بابەتی پێشتر

فەرمی.. گاڤی بۆ لیستی ملیارییەکان

بابەتی دواتر

بەناوی "ئاژانسی پاراستن"ەوە هەڕەشەی كوشتن لە ئەندامانی خێزانێك دەكرێت

بابەتی پەیوەندیدار
Total
7
Share