وەزارەتی پێشمەرگە بڵاویكردووەتەوە، ئۆپەراسیۆنێكیان لە ناوچەی قەرە حەسەن و سنووری چەند گوندێك ئەنجامدا.
بەپێی ڕاگەیەندراوێكی وەزارەتی پێشمەرگە كە وێنەیەكی دەست تۆڕی میدیایی ئێستا كەوتووە و تێیدا هاتووە، سەرلە بەیانی ئەمڕۆ سێشەممە، لیوای 22ی پیادەی وەزارەتی پێشمەرگە، لە میحوەری چواری هێزەكانی پێشمەرگە، ئۆپەراسیۆنێكیان لە سنووری ناوچەی قەرە حەسەن بۆ گوندەكانی جەوەڵ بۆر و ئاخور گورجی و ئەو ناوچانەی، كە گومان دەكرا تیرۆریستانی داعش وەك رێڕەوی هاتوچۆ و مانەوەیان بەكاریاندەهێنا، ئەنجامدا.
لە ڕاگەیەندراوەكەدا هاتووە، ئۆپەراسیۆنەكە، لە چوار قۆڵەوە دەستیپێكرد و ماوەی شەش كاتژمێر بەردەوامبووە و یەكەكانی لیوای 22ی پیادە بەشداربوون.
ئاماژە بۆ ئەوەش كراوە، لە كۆتایی مانگی ئابدا تیرۆریستانی داعش دوو هاوڵاتیی كوردی خەڵكی ناوچەكەیان شەهیدكرد.
