وەزارەتی بەرگریی ئەفغانستان ئاشکرایکرد، فڕۆکەیەکی ئەمریکی لەکاتی مەشقکردنی سەربازانی تاڵیباندا کەوتووەتەخوارەوە و سێ ئەندامی تیمەکەی گیانیان لەدەستداوە.
بەپێی هەواڵی وەزارەتی بەرگری ئەفغانستان، کۆپتەرەکە دروستکراوی ئەمریکایە لە کابول کەوتووەتەخوارەوە، بەهۆیەوە دوو فڕۆکەوانەکەی و ئەندامێکی تیمی فڕۆکەوانییەکە گیانیان لەدەستداوە.
کۆپتەرەکە کە ناوی “بلاک هۆک”ـە، لە کامپی زانکۆی بەرگری لە پایتەختی ئەفغانستان کەوتووەتەخوارەوە.
ئاژانسی رۆیتەرز بڵاویکردەوە، “هێڵیکۆپتەری ئەمریکیی بلاک هۆک لەکاتێکدا فڕیوە بۆ مەشق و ڕاهێنان بە سەربازانی تاڵیبان و بەهۆی کێشەیەکی تەکنیکییەوە کەوتووەتەخوارەوە”، وتەبێژی وەزارەتی بەرگریی ئەفغانستان عەنایەتوڵا خواریزمی ئاماژەی بەوەکردووە، پێنج کەسیش لە ڕووداوەکەدا برینداربوون.
ئەو فڕۆکە ئەمریکییە پێشتر لەلایەن تاڵیبانەوە دەستیبەسەرداگیراوە، وەک هەندێکی دیکە لەو کەلوپەلە سەربازییانەی لەو وڵاتەدان و لە بنەڕەتدا ئەمریکیین ئێستا بزوتنەوەی تاڵیبان خاوەندارێتییان دەکات.
