دوای ڕفاندنی لە لایەن چەند چەكدارێكەوە، پارێزەرێك بە دەست و پێ و چاو بەستراوی دۆزرایەوە و ڕزگاركرا.
لەیس حەسەن حەمید پارێزەرێكی عێراقییە، پێش سێ ڕۆژ چەند چەكدارێك لە ناوچە كوردستانییەكانی پارێزگای دیالە ڕفاندبوویان و ئاژانسی هەواڵگری ڤیدیۆی ساتی ڕزگاركردنی بڵاوكردەوە.
هاوكاتی بڵاوكردنەوەی ڤیدیۆكە، ئاژانسی هەواڵگری و لێكۆڵینەوەی فیدراڵی لە وەزارەتی ناوخۆ ڕایگەیاند، پارێزەرەكە سێ ڕۆژ لەمەوبەر لە مقدادییە ڕفێندرابوو، بەڵام بە كۆكردنەوەی زانیاریی هەواڵگریی شوێنەكەی ئاشكراكراوە.
بەپێی ڕاگەیەندراوێك كە ئاژانسی هەواڵگری و لێكۆڵینەوەی فیدراڵی ئەمڕۆ هەینی بڵاویكردەوە، مەفرەزەیەكی هێزەكانی ئاژانسی هەواڵگری ڕفێندراوەكەیان لە ناوچەی “شاخە” ڕزگاركردووە و ڕفێنەرەكانیش دەستگیركراون.
