جێگری سەرۆكی فراكسیۆنی یەكێتی لە پەرلەمانی كوردستان ڕایدەگەیەنێت، پێنج فراكسیۆنی پەرلەمانی كوردستان داوای هەمواركردنەوەی یاسای هەڵبژاردنمان كردووە كە دەبێت سیستمی هەڵبژاردن فرەبازنە بێت و كورسیی پێكهاتەكانیش بەسەر سەرجەم بازنەكاندا دابەشبكرێن، جەختیشدەكاتەوە تا یاسای هەڵبژاردن هەموارنەكرێتەوە ناتوانرێت كاتی هەڵبژاردن دیاریبكرێت.
ئاشكرایكرد، “پێشنیازە یاسایەكمان پێشكەشكردووە و داوامانكردووە سیستمی هەڵبژاردن بكرێتە فرەبازنە و كورسیی پێكهاتەكانیش بەسەر سەرجەم پارێزگاكاندا دابەشبكرێن و گفتوگۆكان بەردەوامن و تا ئەو كاتەی یاسای هەڵبژاردنیش هەموارنەكرێتەوە ناتوانرێت كاتی هەڵبژاردن لە هەرێمی كوردستان دیاریبكرێت، جگەلەوەش كۆمسیۆن پێویستی بە وادەیەكە بۆ ئەوەی ئامادەكارییەكانی دەستپێبكات بۆیە بەر لە درێژكردنەوەی تەمەنی پەرلەمان دەبێت ڕێككەوتن لەسەر هەمواركردنەوەی یاسای هەڵبژاردن بكرێت.
