بافڵ جەلال تاڵەبانی، سەرۆكی یەكێتیی نیشتمانیی كوردستان لە بارەگای مەكتەبی سیاسی لە هەولێر پێشوازیكرد لە وەفدێكی باڵای سیاسی و سەربازیی بەریتانیا بە سەرۆكایەتیی مارشاڵ سامی سامسپۆن، ڕاوێژكاری باڵای سەربازیی بەریتانیا بۆ ڕۆژهەڵاتی ناوەڕاست و باكووری ئەفریقا.
لە دیدارێكدا كە دەیڤد هەنت، كونسوڵی بەریتانیا لە هەرێمی كوردستان ئامادەبوو، دوایین پێشهاتە سیاسی، ئابوری و ئەمنییەكان تاوتوێكران و جەخت لە یەكخستنی هەوڵەكان بۆ چارەسەركردنی كێشەكان و ڕەخساندنی زەمینەیەكی لەبار بۆ گفتوگۆیەكی نیشتمانیی بەرهەمدار بە بەشداری هەموو هێز و لایەنە سیاسییەكان لەپێناو تێپەڕاندنی بەربەستەكان و زاڵبوون بەسەر ئاڵنگارییەكان كرایەوە .
لە درێژەی دیدارەكەدا پرسی هەڵبژاردن لە هەرێمی كوردستان گفتوگۆی لەبارەوە كرا و سەرۆك بافڵ هەڵوێستی یەكێتی لەبارەی ئەو پرسەوە ڕوونكردەوە و وتی، “یەكێتی لەگەڵ هەڵبژاردنە لە وادەی دیاریكراوی خۆیدا بەو مەرجەی یاسای هەڵبژاردن هەمواربكرێتەوە و دەبێت یاساكە لەگەڵ دۆخی ئەمڕۆی هەرێم بگونجێت و بۆ ئەمەش پێویستیمان بە سازانی نیشتمانی و ڕێككەوتنێكی هەمەلایەنە”.
پاراستنی سەقامگیریی ناوچەكە و ڕووبەڕووبوونەوەی پاشماوەكانی داعش تەوەرێكی تری دیدارەكە بوو و بافڵ جەلال تاڵەبانی جەختی لە پێویستی و بەردەوامی هەماهەنگی نێوان هێزەكانی هەرێمی كوردستان، عێراق و هاوپەیمانان كردەوە لەپێناو ئارامی و ئاسایشی ناوچەكە و داوایكرد، بەریتانیا لە هاوكارییەكانیان بۆ هێزی پێشمەرگە بەردەوامبن.
