لە چەمچەماڵ دوو كەس بە تۆمەتی ساغکردنەوەی دراوی ساختە دەستگیرکران و ئاسایش وردەكارییەكان ئاشكرادەكات.
بەشی ڕاگەیاندن و پەیوەندییەکانی بەڕێوەبەرایەتیی ئاسایشی ڕۆژئاوای سلێمانی ڕایگەیاند، “لە ئۆپەراسیۆنێکی هاوبەشی نێوان هێزەکانمان لە بەڕێوەبەرایەتیی ئاسایشی ڕۆژئاوای سلێمانی و هێزەکانی بەڕێوەبەرایەتیی ئاسایشی سلێمانی بۆ دەستگیرکردنی ئەو کەسانەی کە مامەڵە بە دراوی ساختەوە دەکەن و لە بازاڕدا بەکاریدەهێنن، لەسەر بنەمای زانیاریی ورد و پاش وەرگرتنی ڕەزامەندیی بەڕێز دادوەری دادگەی لێکۆڵینەوە، تۆمەتبارێک بە ناوی (س، ھ، م ) لە قەزای چەمچەماڵ دەستگیرکرا”.
لە کاتی دەستگیرکردنیدا، تۆمەتبارەکە بڕێک دراوی ساختەی پێبووە لە جۆری 100 دۆلاریی ئەمریکی وەك ئاسایش ئاشكرایكرد و دەڵێت، “پاش پشکنینی ماڵەکەی بڕێکی دیکەی دۆلاری ئەمریکیی ساختە دەستیبەسەردا گیرا و لە کاتی لێکۆڵینەوە و پشکنینی مۆبایلەكەیدا، چەندین وێنە و ڤیدیۆ و مەسج لە مۆبایلی تۆمەتباردا هەبوون کە تیایاندا باس لە ئاڵوگۆڕی دراوی ساختە و مامەڵەکردن بە چەکەوە دەکات”.
بەپێی ڕاگەیەندراوەكەی بەڕێوەبەرایەتیی ئاسایشی ڕۆژئاوای سلێمانی، تۆمەتبارێکی دیکە بە ناوی (ف، ع، ح) بە هەمان تۆمەت لە چەمچەماڵ دەستگیرکرا و هەردوو تۆمەتبار بە بڕیاری دادوەری دادگەی لێکۆڵینەوە و بەپێی ماددەی (281) لە یاسای سزادان ڕاگیران.
