بەهۆی كەوتنەوەی ئاگر لە ئۆتۆمبێلەكەیدا كادرێكی بەرەی توركمانی برینداربوو، حزبەكەی دەڵێت، بۆمبی لكێندراوی پێداتەقیوەتەوە.
كاتژمێر 9:30 خوله‌كی به‌یانی ئه‌مڕۆ له گه‌ڕه‌كی شێخان لە سلێمانی، ئاگر له ماڵێكدا كه‌وته‌وه و به‌هۆیه‌وه كادرێكی سەر بە بەرەی توركمانی برینداربوو، جگه له سووتانی ئۆتۆمبێل و به‌شێك له خانوه‌كه‌ی.
دەربارەی ڕووداوەكە بەرەی توركمانیی عێراقی ڕاگەیەندراوێكی بڵاوكردەوە و دەڵێت، ڕووداوەكە بەهۆی تەقینەوەی بۆمبێكەوە بووە كە بە ئۆتۆمبێلەكەیەوە لكێندراوە.
دوای ڕووداوەكە هێزە ئەمنییەكان گەیشتوونەتە شوێنەكە و لێكۆڵینەوەیان لە ڕووداوەكە دەستپێكردووە، بەڵام تائێستا هیچ لێدوان یان ڕاگەیەندراوێكی فەرمییان بڵاونەكردووەتەوە.
