سەرۆكی حكومەتی هەرێم ڕایدەگەیەنێت، هەرێم هەموو ئەرک و پابەندبوونەکانی خۆی بۆ گەیشتن بە ڕێککەوتن لەسەر بنەمای دەستوور جێبەجێ کردووە، دەشڵێت، بۆیە پێویستە حکومەتی فیدراڵ ماف و شایستە داراییەکانی هەرێم دابینبکات.
مەسرور بارزانی، سەرۆكی حكومەتی هەرێمی كوردستان ئەمڕۆ سێشەممە 1ی كانونی یەكەم وتی، “حکومەتی هەرێمی کوردستان، هەموو ئەرک و پابەندبوونەکانی خۆی بۆ گەیشتن بە ڕێککەوتن لەسەر بنەمای دەستوور جێبەجێ کردووە”.
وتیشی، “پێویستە حکومەتی فیدراڵیش ئەرکەکانی خۆی جێبەجێ بکات و ماف و شایستە داراییەکانی هەرێم دابینبکات”.
ئەو وتانەی مەسرور بارزانی ئەمڕۆ لەمیانەی پێشوازیكردنیدا بوو لە شاندێكی بەریتانی کە پێکهاتبوو لە جەیمس کلیڤەرلی، وەزیری دەوڵەت بۆ کاروباری ڕۆژهەڵاتی ناوەڕاست و باکوری ئەفریقیا و جەیمس هیپی، وەزیری هێزە چەکدارەکان و ستیفن هیکی، باڵیۆزی بەریتانیا لە عێراق.
بەپێی ڕاگەیەنراوێكی ئەنجومەنی وەزیران، لە دیدارەکەدا گفتوگۆ دەربارەی پەرەپێدانی زیاتری پەیوەندییەکانی نێوان هەرێمی کوردستان و بەریتانیا کرا.
ڕونیشیكردووەتەوە، شاندی بەریتانی ئاماژەی بەوەدا کە خەڵکی بەریتانیا بە ڕێز و ستایشەوە دەڕواننە ڕۆڵی قارەمانانەی پێشمەرگە لە ڕووبەڕووبوونەوەی تیرۆردا، ئامادەیی وڵاتەکەشیان دەربڕی بۆ بەهێزکردنی هەماهەنگی و پەیوەندییەکانی بەریتانیا لەگەڵ هەرێمی کوردستان لە هەموو بوارەکاندا، بە تایبەتی لە بواری بازرگانی و پەرەپێدانی وەبەرهێنانی بەریتانی لە هەرێمی کوردستاندا.
