ئەمینداری گشتیی نەتەوە یەکگرتووەکان هۆشداری دەدات لە مەترسییەکانی سەر هەسارەی زەوی دەڵێت، “هەسارەی زەوی وێران دەبێت” بەهۆی گۆرانکارییەکانی ئاووهەواوە و سەرەتاکەی لە پاکستانەوە دەستیپێکردووە.
لە نووسینێکدا لە تویتەر ئەنتۆنیۆ گۆتێرێش لەبارەی ئەو باران و لافاوەی هەندێک لە وڵاتان و بەتایبەت پاکستانی گرتووەتەوە دەڵێت، “ئەو باران و لافاوەی پاکستانی گرتووەتەوە وێرانکەرە و زیاتر لە 30 ملیۆن پاکستانی زیانیان بەرکەوتووە”.
ئاماژەی بەوەکردووە، “مرۆڤایەتی بەبێ هۆشیاری هەنگاو دەنێت، کردارەکانمان وادەکات گۆڕانکارییەکانی ئاووهەوا هەسارەی زەوی وێران بکات”.
دەڵێت، جیهان لە هەوڵەکانی بۆ وەستاندنی گۆڕانکارییەکان بێئاگایە و نوستووە، جەختیکردەوە کە پێویستە ئێستا و بەخێرایی دەستبکرێت بە ڕاگرتنی ئەو گۆڕانکارییانە.
گۆتێرێش دەڵێت، “ئێستا وێرانبوونی زەوی لە پاکستانەوە سەرەتاکەی دەستیپێکردووە و ئەو وێرانبوونە سبەینێ دەگاتە هەر یەکێک لە وڵاتەکانی ئێمە”.
پاکستان ڕووبەڕووی لافاوێکی بەرفراوان و وێرانکەر بووەتەوە کە بەپێی حکومەتی ئەو وڵاتە زیاتر لە هەزار کەس گیانیان لەدەستداوە و یەک لەسەر سێی وڵاتەکە تووشی لافاوی وێرانکەر بووە.
