چوار سەرۆكایەتییەكەی عێراق كۆبوونەوە و ڕایانگەیاند، ئەم هەفتەیە قۆناغێکی نوێی گفتوگۆی نیشتمانی بەڕێوەدەچێت و داوا لە ڕەوتی سەدر دەکەن بەشداریی تێدابكات.
بەپێی ڕاگەیەندراوی كۆبوونەوەی چوار سەرۆكایەتییەكەی عێراق كە ئەمڕۆ دووشەممە لە سەرۆكایەتیی كۆمار ئەنجامدرا، تاوتوێی پێشهاتەکانی گۆڕەپانی سیاسی و دۆخی چەقبەستووی عێراق كرا، كە ماوەی زیاتر لە 10 مانگە دروستبووە.
لە كۆبوونەوەكەدا جەخت لەسەر “پاراستنی ئاسایش و سەقامگیریی دامەزراوەكانی دەوڵەت و گفتوگۆی بنیادنەرانە كرایەوە، هەروەها ڕێگەیەک بۆ کۆتاییهێنان بە هەموو ناکۆکییەکانی ئێستا”.
هەر لە كۆبوونەوەكەدا سەرۆكایەتییەكان پشتیوانیی خۆیان بۆ بانگەوازەكەی مستەفا كازمی سەرۆك وەزیرانی عێراق دووپاتكردەوە، كە گەڕێكی دیكەی كۆبوونەوەكان لەم هەفتەیەدا ئەنجامبدرێت و گفتوگۆی نیشتمانی لە بارەی چارەسەركردنی قەیرانەكان بكرێت، داواشدەكەن كە ڕەوتی سەدر ئامادەی كۆبوونەوەكە بێت.
لە بەشێكی دیكەی ڕاگەیەندراوەكەدا هاتووە، “داوا لە سەرجەم هێزەكان دەكەین، شەڕی میدیایی ڕابگرن، كه كاریگه‌ریی نه‌رێنی له‌سه‌ر به‌رژه‌وه‌ندییه‌كانی وڵات و خەڵك هەبووە”.
