وەزیری پێشمەرگە ڕایگەیاند، “لەپرسی پێكهێنانی دوو لیوا هاوبەشەكە، لەلای وەزارەتی پێشمەرگەوە سەرجەم كارەكانی تەواوكراون و چاوڕوانی وەزارەتی بەرگریی عێراقین”.
بەپێی ڕاگەیەندراوێكی وەزارەتی پێشمەرگە كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمڕۆ یەكشەممە شۆڕش ئیسماعیل، وەزیری پێشمەرگە پێشوازیكرد لە جەنەڕاڵ مۆڕاندـ ی فەرەنسی لە هێزەكانی هاوپەیمانان و بەرپرسی ئۆپەراسیۆنەكانی یەكلایكردنەوەی پۆڵاین، كۆڵۆنێڵ ڕۆنان، بەرپرسی (تاسك فۆڕس هیدرا)شاندێكی یاوەریان.
لە ڕاگەیەندراوەكەدا هاتووە،لە كۆبوونەوەكەدا دۆخی ئێستای عێراق و هەرێم و ناوچەكە و مەترسییەكانی تیرۆر، گفتوگۆیان لەبارەوە كرا و فەرماندەی ئۆپەراسیۆنی یەكلایكردنەوەی پۆڵاین، ستایشی هەوڵ و هەنگاوەكانی پڕۆسەی چاكسازی لە وەزارەتی پێشمەرگە كرد و پاڵپشتی و پشتیوانیی وڵاتەكەی و ڕاوێژكارانی سەربازیی سوپای فەرەنسا و هاوپەیمانانی بۆ پێشمەرگە دووپاتكردەوە.
هەر لە كۆبوونەوەكەدا هەردوولا گفتوگۆیانكرد، لەبارەی كارەكانی پێكهێنانی دوو لیوای هاوبەشی نێوان پێشمەرگە و سوپای عێراق، بۆ ئەمەش وەزیری پێشمەرگە باسی لەوەكرد،” لەپرسی پێكهێنانی دوو لیوا هاوبەشەكەدا لەلای وەزارەتی پێشمەرگەوە سەرجەم كارەكانی تەواوكراون و چاوڕوانی وەزارەتی بەرگریی عێراقین”.
