بەڕێوەبەرایەتیی گشتیی دژەتیرۆر رایدەگەیەنێت، لە كاتژمێر 07:05ی ئێوارەی ئەمڕۆ، هێرشێكی درۆنی كرایە سەر كێڵگەی غازی كۆرمۆر كە دەكەوێتە سنووری قەزای چەمچەماڵ و بەپێی زانیارییە هەواڵگرییەكان هێرشەكە هیچ زیانێكی گیانی و ماددی نەبوو.
بەپێی راگەیەندراوێكی بەڕێوەبەرایەتی گشتیی دژەتیرۆر كە وێنەیەكی دەست تۆڕی میدیایی ئێستا كەوتووە و تێیدا هاتووە، لە كاتژمێر 07:05ی ئێوارەی ئەمڕۆ، هێرشێكی درۆنيی خۆكوژ ئاراستەی كێڵگەی غازی كۆرمۆركرا، كە دەكەوێتە سنووری چەمچەماڵ كە بەپێی زانیارییە هەواڵگرییەكان، درۆنەكە لە ناوچەی بەشیرەوە ئاراستە كراوە و لەلایەن گروپە میلیشیا و یاساشكێنەكانەوە جێبەجێكراوە.
هەر لە راگەیەندراوەكەدا هاتووە، هێرشەكە هیچ زیانێكی گیانی و ماددی بەدواوە نەبوو و كێڵگەكە و كۆمپانیای دانەغاز بە تەواوی پارێزراون.
ئاماژە بۆ ئەوەش كراوە، دەزگا ئەمنییەكان دڵنیایی دەدەنە هاوڵاتییان كە بە وردیی بەدواداچوون بۆ ئەم پێشێلكارییە دەكات و هەر زانیارییەكی نوێ لەم بارەیەوە رادەگەیەنرێت.
