وەزارەتی سامانە سروشتییەكانی هەرێم، وەڵامی نامەكەی كۆمپانیای سۆمۆ دەداتەوە و ڕایدەگەیەنێت، هەوڵەكانی ئەو كۆمپانیایە بۆ تێكدانی گفتوگۆكانی نێوان هەولێر و بەغدادە.
23ی ئەم مانگە، كۆمپانیای (سۆمۆ) لە نامەیەكدا ڕایگەیاندبوو، كە ڕێكاری یاسایی لە دژی كڕیاران و بازرگانانی نەوتی هەرێمی كوردستان دەگرنەبەر، لەبەرامبەردا وەزارەتی سامانە سروشتییەكانی هەرێم، وەڵامی نامەكەی داوەتەوە و جەختی كردووەتەوە، “نامەكەی كۆمپانیای سۆمۆ هیچ نییە، جگە لە دڵۆپێكی دیكە لە زانیاریی هەڵبەستراو و چەواشەكارانە و بەشێكە لە شەڕێكی سیاسی”.
وەزارەتەكە دەشڵێت، “ئەو شەڕەی كۆمپانیای سۆمۆ، هەوڵێكە بۆ تێكدانی گفتوگۆكانی نێوان هەولێر و بەغداد و دروستكردنی بەربەستە لەبەردەمیاندا، كە ئەمەش درێژكراوەی هەمان سیاسەتی دادگای فیدراڵییە، كە دژی هەرێمی كوردستان گرتوویانەتەبەر”.
بۆیە وەزارەتی سامانە سروشتییەكان، ڕەخنەی لە دادگای باڵای فیدراڵی گرتووە و جەختی لەوەشكردووەتەوە، “كە بڕیارەكەی پێشووتریان دەستووری نییە، لەبەرئەوی خودی دادگاكە بەپێی دەستووری فیدراڵی پێكنەهاتووە، هەربۆیە بڕیارەكانیشی هیچ قورسایییەكی یاسایی لە عێراق و شوێنەكانی دیكەشدا نییە”.
