وتەبێژی وەزارەتی دارایی هەرێم رایدەگەیەنێت، لەگەڵ دابەشكردنی مووچەی فەرمانبەرانی عێراقدا ئومێدەوارین بەغداد شایستەی دارایی هەرێم بنێرێت و دەشڵێت، “هەر كاتێك بەغداد پارە بنێرێت دەست بە دابەشكردنی مووچە دەكەین”.
هونەر جەمال وتەبێژی وەزارەتی دارایی هەرێم لە لێدوانێكی رۆژنامەوانیدا رایگەیاند، شاندی هەرێم لەگەڵ بەغداد لە گفتوگۆدان و ئومێدەوارین لەم مانگەوە حكومەتی عێراق شایستەی دارایی هەرێم وەك خۆی بنێرێت و جگەلەوەش یاسای بودجە خراوەتە بواری جێبەجێكردنەوە هەرێمی كوردستان مافی خۆیەتی شایستە داراییەكانی بۆ رەوانە بكرێت.
راشیگەیاند، شاندێكی دیوانی چاودێریی عێراق سەردانی هەرێمی كوردستانیان كردووە و وردبینی لە كۆی داهاتەكان كردووە و ئومێدەوارین ئەم مانگە دوایین مانگ بێت كێشەی مووچە كۆتایی پێبێت و هیچ پاڵنەرێكی سیاسی لەپشت نەناردنی پشكی هەرێمی كوردستانەوە نەبێت.
