وەزیری گواستنەوە و گەیاندنی هەرێم ڕایدەگەیەنێت، ماوەی یەك مانگ مۆڵەت دراوەتە كۆمپانیاكانی بواری ئینتەرنێت كە پاكێجی خێزانی پەیڕەوبكەن، جەختیشدەكاتەوە كەمكردنەوەی نرخی كارتی مۆبایل بە یاسا لە بەغدادەوە ڕێكخراوە و گرێبەستی كۆمپانیاكانی پەیوەندیكردن لەگەڵ حكومەتی عێراقە و هەرێم ناتوانێت كەمیبكاتەوە.
ئانۆ جەوهەر، وەزیری گواستنەوە و گەیاندنی هەرێم لە كۆنگرەیەكی ڕۆژنامەوانییدا ڕایگەیاند، ماوەی یەك مانگ دراوەتەوە كۆمپانیاكانی بواری ئینتەرنێت كە پاكێجی خێزانی پەیڕەوبكەن و تائێستا دوو كۆمپانیا پابەندبوون بە جێبەجێكردنی پاكێجی خێزانی.
ئاشكرایكرد، ڕاگرتنی هێڵەكانی ئینتەرنێت لە كاتی تاقیكردنەوەكان بۆ بەرژەوەندیی خوێندكاران بووە كە پڕۆسەی تاقیكردنەوەكان شەفاف بەڕێوەبچێت و هەماهەنگی لە نێوان حكومەت و پەرلەماندا هەیە.
لەبارەی كەمكردنەوەی نرخی كارتی مۆبایل، وەزیری گواستنەوە و گەیاندن باسی لەوەش كرد، لە هەر سێ كۆمپانیای بواری پەیوەندیكردن كاردەكەن كە گرێبەستیان لەگەڵ حكومەتی عێراق كردووە و لە ساڵی 2016ەوە بڕیاری زیادكردنی نرخی كارتی مۆبایل دراوە و بە یاسا ڕێكخراوە و دەبێتە داهات بۆ حكومەت و ئێمە هەوڵمانداوە ئەو داهاتە بگەڕێتەوە بۆ حكومەتی هەرێم و نەتواندراوە.
