سەرۆكی هەرێمی كوردستان لەبارەی دۆخی سیاسیی عێراق و پەكخستنی دەسەڵاتی دادوەری پەیامێكی بڵاوكردەوە و ڕایگەیاند، “پەكخستنی دامەزراوەی دادوەریی دۆخەكە ئاڵۆزتر دەكات، بۆیە داوا لە هەموو لایەنەكان و لە خۆپيشاندەران دەكەین دامەزراوەكان و ئاشتیی كۆمەڵایەتی بپارێزن و لە ڕەوتی ئاشتییانە و مەدەنی دوورنەكەونەوە”.
نێچیرڤان بارزانی، سەرۆكی هەرێمی كوردستان ئاماژەی بەوەش كرد، “وڵات چیتر بەرگەی ئەم هەموو قەیرانە سەخت و بارگرژییە ناگرێت و درێژەكێشانی زیاتری ئاڵۆزی، دواجار بە زیانی تەواوی گەلی عێراق تەواو دەبێت”.
ڕاشیگەیاند، “بەوپەڕی پەرۆشی و نیگەرانییەوە لە پێشهاتە سیاسییەكانی عێراق دەڕوانین كە تا دێت بە ئاراستەی پەرتەوازەیی و قووڵتربوونەوەی زیاتری قەیرانەكان و دووركەوتنەوەی ئاسۆی چارەسەردا دەڕۆن. دۆخەكە وا خەریكە داهاتووی وڵات و ئاشتیی كۆمەڵایەتی دەخاتە مەترسییەكی جدییەوە و كۆی پرۆسەی سیاسی و حوكمڕانی و دامەزراوەكان پەكدەخات”.
سەرۆكی هەرێم ئاماژەی بەوەشكرد، “خۆپيشاندانی مەدەنیی ئاشتییانە، مافێكی ڕەوا و دەستووریی پارێزرا‌وە، بەڵام پەكخستنی دامەزراوەی دادوەریی دۆخەكە ئاڵۆزتر دەكات، بۆیە داوا لە هەموو لایەنەكان و لە خۆپيشاندەران دەكەین دامەزراوەكان و ئاشتیی كۆمەڵایەتی بپارێزن و لە ڕەوتی ئاشتییانە و مەدەنی دوورنەكەونەوە و وڵات چیتر بەرگەی ئەم هەموو قەیرانە سەخت و بارگرژییە ناگرێت و درێژەكێشانی زیاتری ئاڵۆزی، دواجار بە زیانی تەواوی گەلی عێراق تەواو دەبێت”.
نێچیرڤان بارزانی دەڵێت، “ئێمە لە هەرێمی كوردستان جارێكی دیكە جەخت لەوە دەكەینەوە كە وەك هەمیشە بەشێكین لە چارەسەر و هەموو هاوكارییەك دەكەین بۆ لێكگەیشتن و پێكهاتنی لایەنە عێراقییەكان. وڵات پێویستی بە گفتوگۆیەكی جددیی نیشتمانی و بەرپرسیارانەی لایەنە سیاسییەكانە بۆ دۆزینەوەی چارەسەر لەسەر بنەمای دەستوور، هەر ئەوەش تاكە ڕێگەی دروستە بۆ دەرچوون لە قەیران و بنبەستی سیاسی و گەیاندنی وڵات بە كەناری ئارامی”.
