نوێنەری زیندانیانی بادینان دۆخیان بە خراپ ناودەبات و دەڵێت، بە دەستێوەردانی حزبی ڕێگری لە ئازادكردنیان دەكرێت.
ئەیھان سەعید، نوێنەری زیندانیانی بادینان پەیامێكی بۆ ڕای گشتی بڵاوكردەوە و ڕایگەیاند، دۆخی زیندانیانی بادینان و گشت مانگرتووانی دیكە لە زیندانی چاکسازیی گەورانی ھەولێر خراپە و بە دەستێوەردانی حزبی بە ئاشکرا ڕێگری لە بەڕێوەچوونی ڕێکكارە یاساییەکان دەکرێت و سەبارەت بە مافی ئازادبوونی بەمەرج لەلایەن ئیدارەی چاکسازی و دادگا.
دەشڵێت، “زۆر بە گومانین لە جۆری مامەڵەکردنی بەرپرسانی ئیدارەی زیندانی چاکسازی لەگەڵ گیراوەکانمان تا ڕاددەی گومانی (پیلانی ڕەش و تیرۆری بایلۆجی) بەتایبەت لەم ڕۆژانەی دوایدا، بۆ ئەم مەبەستەش بەووردی لایەنە پەیوەندیدارەکانی ناوخۆ و نێودەوڵەتیەکانمان لێئاگادارکردوەتەوە”.
بە ڕاسپاردەی وەزیری کار و کاروباری کۆمەڵایەتی لیژنەیەکی سێقۆڵی پێکھێنراوە لە (دەستەی سەربەخۆی مافی مرۆڤ، بەرێوەبەرایەتی چاکسازییەکان و بەڕێوەبەری کارگێڕیی زیندانی چاکسازی) بۆ چاودێریکردنی دۆخ و ڕێکارە یاساییەکان، وەك ئەوەی ئەیهان سەعید ئاماژەی پێدا و ئەوەی خستەڕوو، تائێستا و دوای تێپەڕبوونی زیاتر لە مانگێك لە مانگرتنیان، تەنھا پەنجەمۆری بەشێکیان وەرگیراوە و لەمپەر لە بەردەم ڕێکكارەکان دروست دەکرێت و ھەر جارە و بە بیانویەکی نامەنتقی پڕۆسەکە ڕادەگیرێت.
نوێنەری زیندانیان داوادەكات، ڕێگەبدرێت “بە زووترین کات” سەردانی پارێزەران بۆلای زیندانیان بكرێتەوە، هەروەها ڕێگری لە سەردانی ڕێكخراوە جیهانییەكان، لیژنەی مافی مرۆڤی پەرلەمان و لایەنە تایبەتمەندەكان نەكرێت.
هەروەك داوای ناردنی لیژنەیەكی تەندروستیی پسپۆڕدەكات لەلایەن وەزارەتی تەندروستی بۆ هەڵسەنگاندنی دۆخی تەندروستیی مانگرتووان و ئاگادارکردنەوەی ئیدارەی زیندان لە دەستتێوەردانی دۆخی مانگرتووان، ساردکردنەوە و لێكجیاكردنەوەیان و “ھەر پیلانێکی دیكەی ناتەندروست”.
لە كۆتایشدا دەڵێت، “بەپێی ھەموو یاسا کارپێکراوەکان، پێویستە دەستبەجێ گیراوانمان ئازادبکرێن، ئەمەی دەکرێت ڕقێکی سیاسی و شکاندی یاسا و شکۆی دادگایە و ئەرکی گشت لایەکە لەسەری ھەڵوێست وەربگرێت”.
