ئەنتۆنیۆ گۆتیرێش سكرتێری گشتیی نەتەوە یەكگرتووەكان دەڵێت، هەناردەكردنی گەنمی ئۆكرانی و ڕوسی گرنگە بۆ بەرگرتن لە بەرزبوونەوەی نرخی ئەو دانەوێڵەیە.
سكرتێری گشتیی نەتەوە یەكگرتووەكان وتی، “هەندێك وڵاتی ئەفریقی لە كەمبوونەوەیەكی سەختی خۆراكدا دەژین، بەهیواین هەناردەكردنی گەنمی ئۆكرانیا بەردەوامبێت”.
ڕوسیا و ئۆركانیا دوو لە سەرەكیترین وڵاتانی بەرهەمهێنەری گەنمن، بەپێی وتەی ئەنتۆنیۆ گۆتیرێش، هەناردەكردنی گەنمی ڕوسی و ئۆكرانی ڕێگردەبێت لە بەرزبوونەوەی نرخەكەی و وتی، “تا ئێستا زیاتر لە 50 هەزار تۆن گەنم لە بەندەرەكانی ئۆكرانیاوە بۆ وڵاتان بەڕێكراون”.
لە سەرەتای سەرهەڵدانی جەنگی ڕوسیا و ئۆكرانیاوە، یەكەمیان ڕێگەی بە دووەم نەدەدا گەنمەكەی هەناردەی دەرەوە بكات و ملیۆنان تۆن گەنمی ئۆكرانی، بەهۆی داخستنی بەندەر و دەروازە سنوورییەكانی ئەو وڵاتە لە لایەن ڕوسیاوە، لە كۆگاكاندا مابوونەوە و بەوەش نرخی گەنم لەسەر ئاستی جیهان بەرزبووەوە.
لە چەند هەفتەی ڕابردوودا هەردوو وڵاتەكە بە سەرپەرشتیی نەتەوە یەكگرتووەكان ڕێككەوتنێكیان لە توركیا واژووكرد بۆ هەڵگرتنی گەمارۆ لەسەر گەنمی ئۆكرانیا و هەناردەكردنی گەنم بۆ وڵاتان دەستیپێكرد، هەنگاوێك كە گۆڕانگاریی لە نرخی دانەوێڵەدا بەدیهێناوە.
