شانەی ڕاگەیاندن و هۆشیاریی پێشمەرگە ڕایگەیاند، ئۆپەراسیۆنە هاوبەشەكەی ئەمڕۆی نێوان هێزەكانی پێشمەرگە و سوپا و هێزە ئەمنییەكانی عێراق كۆتاییهات و تەواوی ئەو ناوچانە كێوماڵكران و ئۆپەراسیۆنەكەش سەركەوتوو بووە.
بەپێی ڕاگەیەندراوێكی شانەی ڕاگەیاندن و هۆشیاریی وەزارەتی پێشمەرگە كە وێنەیەكی دەست تۆڕی میدیایی ئێستا كەوتووە و تێیدا هاتووە، لە درێژەی هاوكاری و هەمانگییە هاوبەشەكانی نێوان هێزەكانی پێشمەرگە و سوپا و هێزە ئەمنییەكانی عێراق، دوای ئەنجامدانی زنجیرەیەك كۆبوونەوە و لێكتێگەیشتن لەنێوان هەردوولادا، بەرەبەیانی ئەمڕۆ پێنجشەممە، ئۆپەراسیۆنێكی هاوبەش لەنێوان هێزەكانی پێشمەرگە و سوپا و هێزە ئەمنییەكانی عێراق لە سنووری میحوەرەكانی 1 و 2 و 3 لە ناوچەی گەرمیان ئەنجامدرا، كە تیایدا لیواكانی پیادەی 3 و 5 و 17ی وەزارەتی پێشمەرگە بەشداربوون.
لە ڕاگەیەندراوەكەدا هاتووە، تەواوی ئەو ناوچانە كێوماڵكران كە لە پلانی ئۆپەراسیۆنی هاوبەش لە نێوان هەردوولادا دانرابوون، هێزەكان تەواوی ناوچەكانیان پشكنی و كێوماڵی دەڤەرەكەیان بە تەواوەتی كرد، دەرئەنجام ئۆپەراسیۆنەكە، لەكاتی دیاریكراودا سەركەوتووانە كۆتاییهات.
ئاماژە بەوەشكراوە، “لەئێستادا بەشێكی زۆری ئەم ناوچانە لەژێر كۆنتڕۆڵی هێزە ئەمنییەكاندان”.
