هاوسەرۆكی كۆنسەی بەڕێوەبەری كەجەكە ڕایدەگەیەنێت، ئەگەر پارتی و توركیا لەم هێرشانەیان سەربكەون شتێك نامێنێت بەناوی هەرێمی كوردستانەوە.
جەمیل بایك، هاوسەرۆكی كۆنسەی بەڕێوەبەری كەجەكە، لەمیانی بەشداریكردنی لە بەرنامەیەكی تەلەفزیۆنیدا ڕایگەیاند، ئامانجی توركیا و پارتی لاوازكردنی پارتی كرێكارانی كوردستان”پەكەكە”و لەناوبردنی تەواوەتی گەلی كوردستانە، بەپێی ئەو پیلانگێڕییەش لە زاپ و ئاڤاشین دەستیان بە هێرشەكانیان كردووە.
بایك ئاشكرایكرد، توركیا هێرشێكی چڕی دەستپێكردووە و پارتیش لە هەموو ڕوویەكەوە لەم شەڕەدا لەگەڵ توركیایە و پارتی دەوروبەری پەكەكە دەگرێت و ناوچەكانی كە پەكەكەی تێدایە لەیەكتریان دادەبڕێنێت و لەهەمانكاتدا سەربازانی توركیا دەپارێزێت.
هاوسەرۆكی كۆنسەی بەڕێوەبەری كەجەكە، داوای لە هاوڵاتییانی هەرێمی كوردستان كرد ڕێگا نەدەن توركیا و پارتی باڵادەستیی خۆیان بەسەر هەرێمی كوردستاندا بسەپێنن.
جەمیل بایك جەختیكردەوە، “ئەگەر توركیا و پارتی سەربكەون شتێك نامێنێت بەناوی هەرێمی كوردستانەوە و هیچ كەسێكی سەر بە پارتییش لە هەرێمی كوردستان لەسەر پێی خۆی نامێنێتەوە”.
