دەستەی كەشناسیی عێراق، پێشبینییەكانی كەشوهەوای ئەمڕۆ و سبەینێی بڵاوكردەوە و شارەزایەكی بوارەكەش دەڵێت، ئەگەری بارانبارین هەیە.
بەپێی ڕاگەیەندراوی ئەمڕۆی دەستەی كەشناسیی عێراق، ئەمڕۆ پێنجشەممە ئاسمان ساماڵ و پەڵەهەور دەبێت، لە هەندێک ناوچەی هەرێمی كوردستان دەگۆڕێت بۆ نیمچەهەور و لە هەردوو پارێزگای سلێمانی و کەرکوک ئەگەری خێرابوونی با هەیە.
لەبارەی پێشبینییەكانی كەشوهەوای سبەینێ هەینییەوە، دەستەی كەشناسیی عێراق دەڵێت، ئاسمان ساماڵ دەبێت لەگەڵ هەندێک پەڵەهەور و پلەکانی گەرما بە نزیکەی یەك پلە نزمدەبنەوە.
هاوكات ئاراس جەبار شارەزای کەشناسی، پێشبینیی بارانبارینی بڵاوكردەوە و ڕایگەیاند، “ھەفتەی داهاتوو بەھۆی مانەوە و دەورانی شێ لە ئاستە بەرزەکانی ھەوادا، زۆربەی کات پەڵەھەور لە ئاسماندا دەردەکەوێت و ھەندێک کاتیش لە ناوچەی جیاجیادا دەگۆڕێت بۆ نیمچەھەور، بە دیارینەکراویش ئەگەری نمەباران کراوە دەبێت لە ناوچە شاخاوییەکاندا”.
