جگە لە چوار پارێزگاكەی هەرێمی كوردستان، لە كەركوك و 14 پارێزگاكەی تر لە مانگی تەمموزی ڕابردوودا چوار هەزار و 827 جیابوونەوەی هاوسەران لە عێراق تۆماركراون.
ئەنجومەنی باڵای دادوەریی عێراق، ئەمڕۆ چوارشەممە ئاماری هاوسەرگیریكردن و جیابوونەوەی هاوسەرانی بۆ مانگی تەمموزی ڕابردوو بڵاوكردەوە و دەڵێت، “20 هەزار و 949 گرێبەستی هاوسەرگیریكردن لە دادگاكان كراون و چوار هەزار و 539 هاوسەرگیریكردنیش لە دەرەوەی دادگاكان ئەنجامدراون”.
بەپێی ئاماری ئەنجومەنی باڵای دادوەری، لە پارێزگای كەركوك 810 هاوسەرگیریكردن لە ڕێگەی گرێبەستی دادگاوە كراون و 93 هاوسەرگیریكردنی دەرەوەی دادگا لە مانگی تەمموزدا هەبوون، لەگەڵ 132 حاڵەتی جیابوونەوەی هاوسەران كە لە هەمان ماوەدا لە كەركوك تۆماركراون.
پێشتر حازم ڕدینی جێگری سەرۆکی ناوەندی مافی مرۆڤ ڕایگەیاندبوو، 73.6%ی کۆی جیابوونەوەکانی هاوسەران لە مانگی تەمموزدا لە عێراق، لە دەرەوەی دادگان بوون.
