سەرۆكی لیژنەی دارایی لە پەرلەمانی كوردستان ڕوونكردنەوە لەبارەی خانەنشينی زۆرەملێ دەدات، جەختدەكاتەوە فەرمانبەر بە زۆرەملێ خانەنشین ناكرێت و ئەوەی باسدەكرێت هیچ بنەمایەكی نییە.
ماوەی چەند ڕۆژێكە باسلەوەدەكرێت كە خانەنشینكردنی زۆرەملێ لە هێزەكانی پێشمەرگە پەیڕەودەكرێت.
زیاد جەبار، سەرۆكی لیژنەی دارایی لە پەرلەمانی كوردستان لە لێدوانێكدا بە تۆڕی میدیایی ئێستای ڕاگەیاند، دوو جۆر خانەنشینی لە هەرێمی كوردستان هەن كە خانەنشینی ئارەزوومەندانە و زۆرەملێیە ئەگەر كەسێك تەمەنی بگاتە 63 ساڵ بە زۆرەملێ خانەنشین دەكرێت.
ئاماژەی بەوەشكرد، ” خانەنشینی ئارەزوومەندانە دەبێت مووچەخۆر تەمەنی 45 ساڵ بێت و 15 ساڵ خزمەتی هەبێت خۆی ڕەزامەند بێت ئەو كات خانەنشین دەكرێت”.
سەرۆكی لیژنەی دارایی پێیوایە، ناتوانرێت خانەنشینی زۆرەملێ پەیڕەوبكرێت و هەر هەوڵێكی لەو شێوەیەش بدرێت دەبێت یاسای خانەنشینی بۆ هەمواربكرێتەوە ئەوەی كە باسدەكرێت بە هیچ شێوەیەك ڕوونادات كە پێشمەرگە و فەرمانبەر بە زۆر خانەنشین بكرێت.
