مستەفا كازمی سەرۆك وەزیرانی عێراق، ئامادەیی خۆی نیشاندا بۆ ڕادەستكردنی دەسەڵات بە هەر حكومەتێك كە پێكبهێنرێت و داوای لە سەركردەكانی عێراق كرد “لە پێناوی وڵاتدا قوربانی بدەن”.
لە ڕاگەیەندراوێكدا كە ئەمڕۆ پێنجشەممە بڵاویكردەوە، مستەفا كازمی سەرۆك وەزیرانی عێراق ڕایگەیاند، “17 ساڵ دواكەوتووین و ئێستا چانسێكمان هاتووەتەپێش، لە ناوەڕاستی ڕێگادا وەستاوین و یەك مەودامان لەگەڵ هەموواندا هێشتووەتەوە، بەهیوام لایەنە سیاسییەكان پشتیوانیمان بكەن”.
سەرۆك وەزیرانی عێراق لە ڕاگەیەندراوەكەیدا دەڵێت، “عێراق لە دوای هەڵبژاردنەوە ڕووبەڕووی گرفتێكی سیاسیی ڕاستەقینە بووەتەوە و پێویستی بە چارەسەرە، ڕێگەچارەكەش وادەخوازێت گفتوگۆ بكرێت” و داوای لە هەموو لایەنەكان كرد گفتوگۆی جددی بكەن و ئەوەی بە “تاكە چارەسەر” ناوزەدكرد.
كازمی داوای لە سەركردەكانی لایەنەكان كرد “لە پێناوی وڵاتدا قوربانی بدەن” و وتی، “پەنابردنەبەر گرژیی میدیایی و نانەوەی پشێوی و ڕووخاندنی ورەی خەڵك، یارمەتیی بنیادنانی ئەزموونی نوێی دیموكراسیمان نادەن”.
