ئاسایشی سلێمانی ڕایدەگەیەنێت، هێزەكانیان دەستیان بەسەر 64 كیلۆگرام ماددەی هۆشبەری كریستاڵ-دا گرتووە
بەڕێوەبەرایەتیی ئاسایشی پارێزگای سلێمانی ڕایگەیاند، ھێزەکانیان لە بازگەی تاسڵوجەی سلێمانی لە ئەنجامی پشکنینی ئاسایی دەستیان بەسەر بڕی 64 كیلۆگرام ماددەی كریستاڵدا گرت کە لە ناو دەبەی ڕۆنی ئۆتۆمبێلدا شاردرابووەوە و لە دەرەوەی هەرێمەوە هێندرابوون.
تۆمەتبارێكیش بەناوی (أ.ح.م.) لەدایكبووی ساڵی 1974 و دانیشتووی شاری سلێمانی دەستگیركراوە كە بەنیازبووە لە سلێمانیەوە بیباتە شارەكانی تر، ئاسایش وادەڵێت.
ئاماژەی بەوەشكرد، تۆمەتبار بە فەرمانی دادوەر و بەپێی ماددەی 25 لە یاسای ماددە هۆشبەرەكان ڕاگیراوە و دەست بەسەر كریستاڵەكەدا گیراوە.
هەوڵەكە لە چوارچێوەی هەڵمەتی دەستگیركردنی بازرگانانی ماددە هۆشبەرەكان و ڕێگریكردنە لە بڵاوبوونەوەی هەر جۆرە ماددەیەكی هۆشبەر، كە زیان بە ئابووری هەرێم دەگەیەنێت و كاریگەریی خراپ لەسەر كۆمەڵگە دروستدەكات.
