میدیاکانی ئیسرائیل بڵاویانکردەوە، ئیبراهیم نابلسی فەرماندە لە ” كەتائیب شوهەدا ئەقسا”ی سەر بە بزوتنەوەی فەتح، لە هێرشێکی سەربازیدا لە نابلس کوژراوە.
ڕۆژنامەی یەدیعوت ئەحرونوت-ی ئیسرائیلی ئاشکرایکرد، هێزەکانی ئیسرائیل بەیانیی ئەمڕۆ گەمارۆی ماڵی ئیبراهیم نابلسییان داوە لە شاری نابلس و لە ئەنجامدا کوژراوە.
ئەفیخای ئەدرعی وتەبێژی سوپای ئیسرائیل ڕایگەیاند، بەیانیی ئەمڕۆ شاری نابلس پێکدادانێکی سەربازیی لەنێوان سەربازانی ئیسرائیلی و چەکدارانی فەڵەستینی بەخۆوەبینی، ئەویش لە میانی گەمارۆدانی ماڵی یەکێک لە داواکراوەکاندا لەو ناوچەیە.
لەوبارەیەوە ئاژانسی هەواڵی فەرمیی فەڵەستینی “وەفا” ئاشکرایکرد، بەیانیی ئەمڕۆ 30 فەڵەستینی بە تەقەی ڕاستەوخۆی سەربازانی ئیسرائیل برینداربوون و چوار لەوانە برینەکانیان سەختە.
ئەو پێکدادانانە لەکاتێکدایە هێرشەکانی سوپای ئیسرائیل و بزوتنەوەی جیهادی فەڵەستینی ماوەی سێ ڕۆژ بەردەوامبوو، دواتر بە نێوەندگیریی میسر ئاگربەست لەنێوانیاندا ڕاگەیەندرا.
