بەڕێوەبەرایەتیی پۆلیسی هەولێر بڵاویكردووەتەوە، بەیانی ئەمڕۆ ئۆتۆمبێلێك كە شۆفێرەكەی ژن بووە بە خێراییەكی زۆر لەسەر شەقامی 100 مەتریی خۆی كێشا بە ژمارەیەك هاوڵاتیی گەشتیاردا كە سەرجەمیان عەرەب بوون و بەهۆیەوە دوو كەس گیانیان لەدەستدا كە یەكێكیان ئەفسەر بووە و دووانی دیكەش برینداربوون.
بەپێی ڕاگەیەندراوێكی بەرێوەبەرایەیەتیی پۆلیسی هەولێر تێیدا هاتووە، ئەمڕۆ هەینی، كاتژمێر 4ی بەرەبەیان، بەڕێوەبەرایەتیی پۆلیسی پارێزگای هەولێر ئاگاداركرانەوە لە ڕووداوێكی هاتوچۆ لە شەقامی 100 مەتری و نزیك سپۆرت سەنتەر شوێنی (غەزالی).
لە ڕاگەیەندراوەكەدا هاتووە، “دەستبەجێ هێزەكانمان گەیشتنە شوێنی ڕووداوەكە و دەركەوت كەوا ئۆتۆمبێلێك لە جۆری هۆندا ڤۆلستەر كە بە خێراییەكی زۆر خۆی بە چەند هاوڵاتییەكدا كێشاوە و بووە هۆی گیان لەدەستدانی هاوڵاتییەك و ئەفسەرێك كە ئەركی لە بەغداد بووە و دوو كەسی دیكەش برینداربوون و تەندروستییان ناجێگیرە”.
ئاماژە بەوەشكراوە، پەڕاوی لێكۆڵینەوە بۆ ڕووداوەكە كراوەتەوە و شۆفێرەكەش بەپێی ماددە 24ی هاتوچۆ ڕاگیراوە و دەست بەسەر ئۆتۆمبێلەكەشیدا گیراوە
