زانکۆی سلێمانی، پلەی یەکەمی سەر ئاستی هەرێمی كوردستان و سێیەمی سەر ئاستی زانکۆکانی عێراقی بەدەستهێنا.
بەپێی نوێترین ڕیزبەندیی بڵاوکراوەی (وێبۆمەتریک) بۆ ڕیزبەندیکردنی ئاستی زانکۆکان، زانکۆی سلێمانی لەسەر ئاستی زانکۆکانی هەرێمی کوردستان پلەی یەکەمی بەدەستهێناوە و لەسەر ئاستی سەرجەم زانکۆکانی عێراقیش پلەی سێیەمی بەدەستهێناوە و پڕۆفیسۆر د. کۆسار محەمەد سەرۆکی زانکۆكە دەڵێت، بەدەستهێنانی ئەو ئاستە بەرزە لە ڕیزبەندیی زانکۆکانی هەرێمی کوردستان و عێراق، بەرهەمی مامۆستایان و خوێندکاران و فەرمانبەرانە.
سەرۆكی زانكۆی سلێمانی، بەدەستهێنانی ئەو دوو پلەیەی گەڕاندەوە بۆ “هەوڵ و ماندووبوون و توێژینەوە ئاست بەرزەکانی مامۆستاكانی زانكۆی سلێمانی” و لە ڕاگەیەندراوێكدا داوا لە مامۆستایان دەکات زیاتر لە هەوڵی پێگەیاندنی خوێندکاران و پێشخستنی زانکۆدا بن و وتی، “دەبێت زانکۆ وەک ناوەندێکی گرنگی ئەکادیمی، لە ڕێگەی زانست و توێژینەوەکانییەوە پەیوەندیی ڕاستەوخۆی لەگەڵ کۆمەڵگەدا هەبێت”.
