لە ماوەی مانگی ڕابردوودا لە ڕۆژهەڵاتی کوردستان، 37 کۆڵبەر لە سنوورەکاندا کوژراون و برینداربوون، ژمارەکە بەراورد بە مانگی ڕابردووتر زیادیکردووە.
ڕێکخراوی هەنگاو بۆ مافەکانی مرۆڤ لە ڕۆژهەڵاتی کوردستان بڵاویکردەوە، تەنها لە مانگی تەمموزدا 37 کۆڵبەر لە سنوورەکان کوژراون و برینداربوون، لەکاتێکدا لە مانگی حوزەیراندا 21 کۆڵبەر ببوونە قوربانی بەوەش بەڕێژەی 76% زیادیکردووە.
بەپێی ئەو زانیاری و داتایانەی ڕێکخراوەکە بڵاویکردووەتەوە، 67%ی کوژران و برینداربوونی ئەو کۆڵبەرانە بە تەقەی ڕاستەوخۆی هێزە ئەمنییەکانی ئێران بووە.
ئاماژە بەوەکراوە، سێ کۆڵبەر لە مانگی ڕابردوودا کوژراون و 34 کۆڵبەریش برینداربوون، زۆترینی کوژراو و بریندارەکانیش لە پارێزگای سنە بوون.
